«Արմավիր» ՔԿՀ-ի դատապարտյալներից մեկը հիվանդանոցում մահացել է

Armlur.am -ի տեղեկությունների համաձայն՝ Արմավիրի ՔԿՀ-ում դատապարտյալներից մեկին տեղափոխել են պատժախուց, որտեղ էլ ինչ-որ իր է կուլ տվել։

Մյուս դատապարտյալները օգնություն են կանչել, արձագանքել է ՔԿՀ-ի ղեկավար կազմը և դատապարտյալին տեղափոխել են քաղաքացիական հիվանդանոց։ Հիվանդանոցում նա մահացել է։

Լրատվամիջոցի տեղեկությունը հաստատել են ՔԿՀ լրատվական ծառայությունից․  

«Ապրիլի 26-ին՝ ժամը 09:30-ի սահմաններում, ՀՀ ԱՆ «Արմավիր» քրեակատարողական հիմնարկի դատապարտյալ Ա. Մ.-ի առողջական վիճակի վատթարացման պատճառով կանչվել է շտապօգնություն,  վերջինս տեղափոխվել է «Վաղարշապատ» բժշկական կենտրոն: Ապրիլի 28-ին՝ ժամը 10:50-ի սահմաններում, արձանագրվել է Ա. Մ. -ի կենսաբանական մահը»։

ՔԿԾ-ից էլ հայտնել են, որ  դատապարտյալը գտնվել է ոչ թե պատժախցում, այլ խցում և եղել է մենակ:   Դատապարտյալի առողջական վիճակի վատթարացումը հայտնաբերել է անվտանգության աշխատակիցը, որից հետո կանչվել է շտապօգնություն և դատապարտյալին տեղափոխել են «Վաղարշապատ» բժշկական կենտրոն: