Տիկին նախարարի սպառնալիքն ու սմայլիկը՝ ուղղված ԲԿ-ներին MediaHub
Առողջապահության նախարար Անահիտ Ավանեսյանը մի ծավալուն գրառում է կատարել իր ֆեյսբուքյան էջում՝ անուղղակի արձագանքելով MediaHub-ի այն հոդվածին, որ նախարարությունը տասնյակ միլիոնների պետպատվերի գումար է պարտք ԲԿ-ներին։ Մեր այս հոդվածին, հիշեցնենք, արձագանքել էր միայն «Էրեբունի» և «Նաիրի» ԲԿ-ների հիմնադիր Հարություն Քուշկյանը՝ շտապելով հերքել, թե նախարարությունն իրենց ոչ մի գումար էլ պարտք չէ, ինքը նախարարի հետ շատ լավ աշխատում է, ոչ մի բողոք-դժգոհություն չունի։
Բայց դա՝ միայն Քուշկյանը, ինչը, ի դեպ, զարմանք ու տարակուսանք էր առաջացրել ոլորտի շատ ներկայացուցիչների մոտ, որ պարոն Քուշկյանը շտապել է հատուկ ընդգծել, որ ինքը նախարարի ու նախարարության հետ որևէ խնդիր չունի, ամեն ինչ կարգին է։ Իսկ մյուս ԲԿ-ները որևէ կերպ չէին հերքել, ավելին՝ տարբեր ԲԿ-ներից մեզ ուղղակի կամ անուղղակի կերպով հաստատել էին, որ նախարարությունը, այո, անցյալ տարվա դեկտեմբերի 15-ից հետո մինչ օրս դեռ իրենց հասանելիք պետպատվերի գումարները չի վճարել, և հույս էլ չունեն, որ կվճարի, քանզի նախարարությունից այդպիսի ազդակներ են ստացել։
Եվ, ահա, երեկ նախարար Անահիտ Ավանեսյանն իր ծավալուն գրառմամբ նախ կշտամբել է մեզ՝ թե «որոշ կայքեր և անձինք դեռ փորձում են շահարկել թեման»: Այդ «որոշ կայքերն ու անձինք» այս դեպքում հենց մենք ենք»։
Ապա ներկայացրել է, որ 2024թ. պետական պատվերի ծառայությունների դիմաց ֆինանսավորումը կազմել է 127 մլրդ դրամ, որը 9 մլրդ դրամով ավելի է, քան 2023թ. փաստացի և 2024թ. տարվա սկզբին հաստատված բյուջեները:
«Այս աճը ցույց է տալիս, որ մենք, դիմելիության օբյեկտիվ աճով պայմանավորված, կարիքը բավարարել ենք և ապահովել ենք կատարողականների դիմաց պատշաճ ֆինանսավորումը, չնայած որ 2024թ. առաջին տարին էր օֆերտայի համակարգին անցում կատարելուն, և բավական դժվար էր կանխատեսել դիմելիության աճը»,- գրել է նախարարը։
Դրանից հետո էլի մի քանի պարբերություն երկար-բարակ բացատրություններ, արդարացումներ և պարզաբանումներ, թե տարվա ընթացքում ինչ են արել ու ինչպես, ու խոստացել, որ հավելյալ կատարողականները հիմա ուսումնասիրվում են, և օբյեկտիվ աճերը միանշանակ կֆինանսավորվեն նորից` ըստ ընթացակարգի:
Ապա մի թեթև կշտամբել է ԲԿ-ներին՝ դժգոհելով նրանց դժգոհությունից․ «Որքանով հասկացա, մի քանի կազմակերպությունների այս մանրակրկիտ մոտեցումը դուր չի եկել, և փորձում են մամուլի միջոցով անընդհատ «պարտք, պարտք» բառը կրկնելով` հասնել ինչ-ինչ նպատակների»։
Բայց, ամենաուշագրավը տիկին նախարարի գրած վերջին պարբերությունն է, որում քողարկված սպառնալիք ու վերջում էլ այդ սպառնալիքը քողարկող սմայլիկ է դրված։
«Ասեմ, որ այս տարի դեկտեմբերի երկրորդ կեսի ֆինանսավորումն առաջին անգամ կիրականացվի ոչ թե փետրվարին, այլ` հունվարին, այսինքն` դեռ մի բան էլ ֆինանսավորման ժամկետները առաջ են բերվել. այնպես որ, այդ մի քանի կազմակերպություններին խորհուրդ կտամ հանգիստ սպասել ուսումնասիրության արդյունքներին և ֆինանսավորմանը, եթե, իհարկե, ամեն բան կարգին է իրենց մոտ»,- ահա այս սմայլիկով էլ վերջակետ է դրել իր ծավալուն գրառմանը նախարար Ավանեսյանը։
Կարճ ասած՝ Անահիտ Ավանեսյանը բժշկական կենտրոններին «բարեկամաբար» խորհուրդ է տալիս «հանգիստ նստել տեղները» և սպասել իրենց ուսումնասիրության արդյունքներին՝ ակնարկելով, որ՝ «դեռ հարց է, թե ձեզ մոտ ինչեր կհայտնաբերենք», ու էս գլխից արդեն կասկած է հայտնում, թե՝ «վստահ մի եղեք, որ ձեզ մոտ ամեն ինչ կարգին է լինելու»։ Այսինքն՝ կա՛մ ԲԿ-ների գործունեության ու պետպատվերով նրանց մատուցած ծառայությունների տակ մի բան կա, ու նախարարը վստահ է, որ այդ «մի բանը» կհայտնաբերի, կա՛մ արդեն կանխակալ վերաբերմունք ունի ԲԿ-ների հանդեպ և ամեն ինչ անելու է, որ մի բան գտնի և հրաժարվի ֆինանսավորումից կա՛մ բավարար չափով այդ գումարները փոխհատուցելուց։
Թերևս սրանով էր պայմանավորված, որ «Էրեբունի» և «Նաիրի» ԲԿ-ները շտապեցին հերքել, թե նախարարությունն իրենց ոչ մի բան էլ պարտք չէ, ոչ մի խնդիր չունեն իրենք տիկին նախարարի հետ, որ հանկարծ վաղը, մյուս օրը իսկապես խնդիր չունենան։
